Eternal decree frees elect by giving converting grace in time—not by suspending the law

XII. Ab aeterno quidem decrevit Deus electos, a poena peccatis ipsorum debita, immunes praestare; verum, non infringendo legem, cujus vi damnationi aeternae subjiciuntur, qui in peccato manent, nec ei renunciant; aut illos ab ista lege excipiendo: sed in tempore iis impartiendo gratiam, per quam in Christum credant, & ad Deum vere convertantur. Qua demum accepta, non prius, desinunt esse irae & damnationi aeternae obnoxii, sicut erant quum peccato inserviebant. Idque virtute ordinationis illius Evangelicae, qua Deus statuit a poenis peccati liberare, & pro justis habere, omnes illos qui in Christum viva fide crederent, a peccato sese averterent, & studium novae vitae amplecterentur. Juxta illud Pauli ad Romanos, Si confessus fueris ore tuo Dominum Jesum, & credideris in corde tuo quod Deus eum suscitavit ex mortuis, salvus eris. Rom. 10. 9. Et ad custodem carceris Philippensis, Crede in Dominum Jesum Christum, & salvaberis. Act. 16. 31. Quo spectat etiam illud Solomonis, Qui abscondit scelera sua non prosperabitur; qui autem confessus fuerit, & reliquerit ea, misericordiam consequetur. Prov. 28. 13. Et quod dicit Deus apud Ezechielem, Si impius egerit poenitentiam ab omnibus peccatis suis quae operatus est, & custodierit omnia praecepta mea, & fecerit judicium & justitiam; omnium iniquitatum ejus, quae operatus est, non recordabor: in justitia sua, quam operatus est, vivet. Numquid voluntatis meae est mors impii, dicit Dominus Deus, & non ut convertatur a viis suis, & vivat? Ezech. 18. 21. Unde est quod Petrus ad Judaeos dicit, Resipiscite, & convertite vos, ut deleantur peccata vestra. Et ad Simonem Magum, Poenitentiam age ab hac nequitia tua, & roga Deum, si forte remittatur tibi haec cogitatio cordis tui.