Placeus preferred — tenacious efficacious persuasion; Vermigli, Musculus, Le Blanc’s own formula

LXXXIX. Sed omnium commodissima, plenissima & brevissima simul, videtur definitio supra allata Josuae Placei, cui fides justificans est, Tenax & efficax persuasio veritatis eorum quae Verbo Dei nobis revelata sunt, speciatim vero promissionis de remissione peccatorum, & vita aeterna nobis per Christum parta. Nam cum dicit fidem illam esse persuasionem veritatis eorum quae Verbo Dei nobis revelata sunt, exprimit totum illud quod haec fides habet commune cum fide historica. Quum vero addit persuasionem illam esse tenacem atque efficacem, sub verbis istis complectitur totum illud quod fidem justificantem, ab historica, discernit atque discriminat. Cum Placei autem definitione coincidit jam ante memorata Petri Martyris descriptio, dum ait Fidem esse firmum certumque assensum Verbis Dei, a Spiritu Sancto afflatum, ad salutem credentium. Et assensum firmum exponit per eum, qui sit tantarum virium & efficaciae, ut secum trahat affectum fiduciae, spei, charitatis, & omnia tandem bona opera, ut praesentis vitae infirmitas patitur. Et etiam Musculi fidem definientis, Constantem assensum cordis ad ea quae vel narrantur, vel promittuntur verbo. Verbis meis dicerem fidem salutarem esse, assensum firmum, practicum, atque fiducialem adhibitum omnibus quae sunt a Deo revelata, speciatim autem promissionibus Evangelii.