Forged or doubted apostolic writings do not level Scripture with oral tradition

XXXIX. At, inquiunt, adversarii, Apostolis etiam multa scripta olim falso supposita sunt, & de quibusdam veris Apostolorum scriptis apud fideles ipsos dubitatum est. Igitur, si hoc argumentum traditionis non scriptae authoritatem tollit, ipsi Scripturae sua non constabit authoritas. Verum haec instantia nec apud nos Scripturae authoritatem evertit, nec argumenti nostri vim contra Pontificias traditiones imminuere potest. Neque enim Scripturae sacrae authoritatem quoad nos pendere volumus a testimonio doctorum Ecclesiae, sed Scripturam a fidelibus immediate & propter se suscipi statuimus, ut quae in se habeat divinitatis suae argumenta & notas insitas: adeoque quorumdam olim dubitatio de quibusdam Scripturae libris authoritati ejus apud nos nihil praejudicare potest. Nec etiam simpliciter traditiones rejicimus, quod quidam olim de iis dubitarunt, sed quia sunt Scripturae adversae, nec in se quicquam habent quo divina ipsis authoritas conciliari possit. Pontificii vero verbi Dei tam scripti, quam non scripti authoritatem quoad nos pendere statuunt a testimonio doctorum Ecclesiae. Adeoque, si prisci Ecclesiae Doctores, ex quorum relatione atque testimonio Ecclesia posteriorum saeculorum accepit traditiones suas, nec aliunde didicit illas ab Apostolis originem habere, si, inquam, prisci illi Ecclesiae Doctores de istis traditionibus tam incerti & varii erant, & eorum plerique in iis discernendis lapsi & decepti sunt, juxta placita Pontificiorum nulla certa authoritas ipsis constare potest.