Pre-faith actual remission would void gospel conditions and contradict alien enmity (Col 1:21; 1 John 3)

XVIII. Ac profecto si ante fidem & conversionem electis peccata actu remissa essent, frustra & sine ratione Scriptura proponeret fidem & poenitentiam, tanquam conditionem sub qua nobis offertur remissio peccatorum, & sine qua illam consequi non possumus. Adde quod ille cui peccata remissa sunt pacem habet cum Deo, & est ipsi reconciliatus. At quomodo hoc convenire potest illis qui sunt adhuc a Deo alienati, & inimici ejus mente & operibus malis? Qualis fidelium & electorum ipsorum ante vocationem & conversionem suam, conditio describitur ab Apostolo Paulo, Coloss. 1. 21. Denique Scriptura sacra beatum praedicat illum cujus tecta sunt peccata, & iniquitates remissae. Sed quis praedicare audebit beatum eum qui adhuc peccatum faciens, nondum ex Deo, sed ex Diabolo est, & charitate vacuus, ac fratrem odio habens, vitam aeternam non habet in seipso manentem, nec translatus est de morte ad vitam, teste Apostolo Joanne Epistolae primae capite tertio? Qui facit peccatum, inquit, ex Diabolo est. Item, Omnis qui non facit justitiam non est ex Deo, & qui non diligit fratrem suum. Et, Qui non diligit manet in morte.